政情：容海恩變鼠王 出橋消滅鼠輩
香港近幾年變咗老鼠樂園，唔少立法會議員都為捉老鼠出謀獻策！沙田老牌地區團體「公民力量」都話新界東老鼠多，單係博康邨都幾千隻，遲吓話唔定要捉一隻去政總請願，睇吓政府搞唔搞！同時代表公民力量同新民黨嘅立法會議員容海恩（Eunice）就話，最緊要捉到隻老鼠，唔好周圍走，符合衞生就得o架喇。睇嚟Eunice都變身「鼠王恩」，要幫新界東街坊拆毀老鼠樂園喎。
新民黨喺一四年同公民力量結盟，而Eunice喺一六年多得公民力量抬轎取得新界東議席，而今年就係公民力量成立廿五周年，佢哋尋日搞傳媒茶敍介紹今年六大關注議題，其中一項就係鼠患。
盼正視 倡捉老鼠去政總示威
公民力量社區發展主任吳彬彬（Rex）話新東鼠患嚴重，早排搵過專家去博康邨視察，發現一個位置已有近八百隻老鼠盤據，估計成條邨都可能有幾千隻，笑言老鼠都可能有住屋問題！佢仲話啲老鼠成隻貓咁大，又唔驚人，周圍摷嘢食唔食毒餌，試過放餌一周，一隻死老鼠都搵唔到，所以，依家搞「民間搜查行動」由線上線下與居民一同搜出鼠患黑點，再要求部門加強巡查。有建議就話可以捉老鼠去政總示威，公民力量嘅幹事都話有得諗，話問題太嚴重，要政府正視。
呢個方法可唔可行？Eunice笑住話係咪要放喺官員枱頭？當知道只係帶去門口抗議，佢就話捉到就好，最緊要唔好周圍走，咪影響衞生就得喇！佢又慨嘆依家Facebook好多人tag佢，影到新界東好多老鼠，真係要諗吓點搞唔好影響居民。
其實立法會有個別女議員都擅長捉老鼠，例如有「鼠王芬」之稱嘅經民聯梁美芬，早年搵咗內地專家去九龍西捉老鼠就一炮而紅，近年連民建聯嘅蔣麗芸都加入做謀士，建議成立流浪貓捉鼠部隊，依家加埋Eunice喺新東捉鼠，立法會應該可組成一個「捉鼠女團」，專門打老鼠！
潘國山臨卸任 欲扶後生上位
另外，身兼新民黨副主席嘅潘國山，公民力量主席一職嘅任期即將屆滿，佢講明想畀班後生仔上位，自己可以留任中委會幫手，佢仲特登捉咗幾個三十出頭至四十歲嘅成員入房傾，睇吓佢哋心意係點？至於一九年嘅區議會換屆，佢話未有安排，但就已經喺大埔、北區同西貢等開咗辦事處，自己亦會繼續服務居民。