中環出更：陸頌雄帶病長跑 「當另類治療」
工聯會（工記）趁住尋日係二○一七年最後一日，喺大美督主壩搞咗個十公里長跑，而工記嘅立法會議員陸頌雄都有落場跑。咪睇佢好似精力充沛，跑完都冇乜喘氣咁款，原來佢尋日感冒病病哋，但佢話堅持落場跑，當係另類治療喎。係咪得o架？
會續推優化工時假期政策
陸頌雄只係參加四公里賽事，雖話喺帶病落場，但跑出嘅時間仲比上次快咗少少。至於快幾多？佢冇透露，只係話依家為參加渣打馬拉松準備緊，所以可以跑快啲。佢又形容尋日清風送爽，空氣清新再加上一望無際嘅藍天，好適合跑步，佢亦都跑得好輕鬆。
展望新嘅一年，佢希望大家都身體健康，工作順利，跟住仲打蛇隨棍上，話工作同生活平衡好重要，有健康先有事業，香港人工時長壓力大，工聯會會繼續推動優化工時同假期政策喎。
出席長跑活動嘅仲有工記嘅議員麥美娟（Alice）同何啟明，見到Alice帶晒圍巾，而何啟明仲着住套老西，好明顯係志在參與，嚟撐吓場喇！工記晨咁早喺大美督主壩搞長跑活動，何啟明話帶挈佢喺船灣淡水湖睇到日出嘅美景添！
卓妮