政情：回顧校長生涯 沈祖堯：本住良心做事
卸任在即嘅中文大學校長沈祖堯，上任之初深受學生歡迎，仲有「祖堯BB」呢個暱稱，轉眼八年過去，沈祖堯因為早前嘅校園港獨風波同學生隔空駁火，搞到民望插水。尋日係沈祖堯最後一日返工，佢回顧校長生涯時候慨嘆現今校園環境政治化，中間派難做，佢喺任內係本住良心做事，希望學生記得佢係一位真誠、冇架子嘅校長。
沈祖堯話，自己上任前承諾嘅目標都兌現。早前校園港獨問題搞出唔少風波，佢要求學生會拆除港獨宣傳品惹學生不滿，佢重申香港係中國嘅一部分，大學唔係政治爭拗嘅場所，所有嘢都要合法。
黃嘉純獲委城大校董會主席
佢仲以蘇軾《定風波》「歸去，也無風雨也無晴」總結校長生涯，至於卸任後就會重拾教鞭，出任中大醫學院內科及藥物治療學講座教授。至於中大新校長段崇智將於明年一月一日上任。
另外，政府宣布委任律師黃嘉純接替胡曉明，出任城市大學校董會主席，任期由明年元旦起生效，為期三年。