中環出更：夠健康多人食蔡少森睇好養魚業
再過多幾日就要送別二○一七年，除咗係時候總結番今年成績外，亦都要開始為明年訂立目標同方向喇！卓妮早前參加一個活動時就見到唔少名人，似乎唔少人亦已展望二○一八年，其中中華廠商聯合會名譽會董蔡少森就睇好養魚業前景喎。
蔡少森話幾年前已開始養魚事業，但佢係利用科技去養殖環保魚，除咗可以減少濫捕，亦能夠確保所養殖嘅魚群質素。佢仲認為，近年全球持續人口老化，大眾為咗健康都多食魚類，所以未來呢行有發展潛力喇！
黃士心興奮新春遊古巴
當日係九龍潮州公會成立紀念大會暨會董就職典禮，一眾核心領導層包括首席會長張敬川、副主席周厚立、副主席黃士心同其兒子、旅遊業議會主席黃進達，同埋會長方平同女兒方溢等都有出席，真係非常之熱鬧。
黃士心就大嘆現時經營旅行社生意較以前困難，因為市場開始飽和，但好彩市民點都要旅行咁話，而佢亦已計劃農曆新年，帶多名友人去古巴同墨西哥玩，同行嘅包括廠商會會長李秀恒。講起古巴之旅時，黃士心一臉興奮，因為今次係佢首次踏足古巴囉！
余偉傑正開拓網上市場
黃進達都認同爸爸指旅行社經營較難，所以不時要有新猷吸引顧客，而最近佢就請到名模帶團，直言去旅行都要有品味，而鑑於近期股市同樓市表現唔錯，加上聖誕同農曆新年相隔遠，佢預料生意會唔錯。
同場仲有國貨公司第三代余偉傑，佢透露公司正在開拓網上市場，明年網上生意所佔嘅比例會有所增加。不過，佢就話點都唔會取代到實體店，因為希望顧客能夠有親身感受，同售貨員多作交流咁話。
卓妮