愛美之心人皆有之，睇吓美容院開到周街都係，就知市場需求有幾大。可惜吖，由於當局無監無管，放任自流，搞到呢個原本「美麗」嘅行業烏煙瘴氣，醜陋不堪，顧客美容變毀容甚至攞命有之，強迫購物被劏到一頸血有之，你話班廢官係咪靠害吖！
話口未完又嚟喇！有市民向政黨求助，話早前喺一間美容院試用服務後，買咗七千幾蚊療程，點知原來係噩夢嘅開始。據事主所講，佢一上門幫襯啫，就被要求寬衣解帶，有人仲不斷疲勞轟炸幾粒鐘，七嘴八舌對佢評頭品足，不堪壓力下焗住簽咗五萬蚊單；之後嗰次仲離譜，除咗剝光豬外，有人仲恐嚇話佢身上嘅疣會傳染，又擅自攞佢嘅信用卡嚟碌，事主就係咁前前後後唔見咗十七萬銀。不過涉事店舖就有另一個講法，話事主購買服務時「表現雀躍」，強調銷售手法冇問題喎。
即係咁，一個月入二萬蚊嘅打工仔，碌爆幾張信用卡，花近十個月人工購買美容療程，到底合唔合乎常理，係咪喺正常情況下消費，讀者不妨自行判斷。唔理點都好，美容院不良銷售手法早就備受詬病，類似投訴厚過本電話簿，係不爭嘅事實。有人計過數，喺近三百宗美容投訴個案裏面，超過六成涉及美容顧問銷售手法，除咗上面提到嘅，仲包括未有說明療程服務期限、呃事主可以免息分期付款，甚至搵俊男美女向「寂寞的心」埋手等，平均每宗金額超過七萬蚊，直頭好過去搶。
不良業者之所以有恃無恐，劏客醜聞之所以不絕如縷，講到尾都係因為官老爺食塞米。話就話有《商品說明條例》規管不良營商手法，但當局有法不依，有法等於冇法，有人話當局姑息縱容，變相鼓勵人發黑心財，一啲都冇講錯。
睇到喇，香港號稱「購物天堂」，實際上消費陷阱無處不在，美容業藏污納垢，旅遊業強迫購物、健身中心呃智障人士落疊、藥房海味店以錢代両、阿婆被昆棺材本「投資」迷你債券搞到血本無歸……同嗰啲電訊騙徒簡直如出一轍。
講真，要保障消費者權益，其實唔係咁難，爭在官老爺有冇心嘅啫。就講包括美容療程在內嘅預繳式消費，澳洲及加拿大等地一早引入冷靜期制度，消費者就算被「威逼利誘」，都可以先行脫身再取消張單，弊在港府傾向商家利益，一味扮聾扮盲；即使醫學美容三番四次搞出人命，當局監管依然係雷大雨小，軟弱過無牙老虎，簡直不負責任。
港產官僚究竟幾時至肯做嘢？唔通真要屋企人畀人剝光豬疲勞轟炸，針拮到肉至知痛？