政情：有相為證：林正財大學時代圓碌碌
熱愛踩單車嘅行政會議成員、安老事務委員會主席林正財，唔單止未見中年發福，身形更Fit過唔少年輕人。但係人生總有最肥嘅日子，佢尋日喺網上展示一幅讀書時期同大學同學遠足嘅舊相，相中右後排面形最「圓碌碌」嘅男生，竟然就係年輕時嘅林正財！
做醫生即刻變瘦
林正財接受本報查詢時話讀大學期間係人生最肥嘅階段，原因係當時就讀嘅醫科功課壓力大，需要全神貫注讀書，鮮有運動之餘，更不時食消夜「開夜車」溫習，久而久之就變咗一個肥仔，而呢幅相係佢少有同大學同學行山運動嘅舊照。其後佢畢業擔任醫生，反而立刻就瘦咗，原因係「忙到無時間食飯」，搞到健康愈嚟愈差咁話。
後來佢任職伊利沙伯醫院，立定決心改善健康，去咗華員會學游水。佢笑言當時游泳班同學都係老婆婆同小朋友，只有佢一個壯年男士，起初都感到好尷尬，但後來唔少人中途放棄，「原本二十人，畢業得番四個人，我係其中之一」，佢更一次過學識自由式、蛙式同背泳，自此愛上運動添！