政情：避到加會敵唔過天氣 陳恒鑌「追星」夢落空
雙子座流星雨早前落幕，日前咁啱遇到立法會議員陳恒鑌（Ben），原本佢都打算露營觀星，雖然曾經以為會因立法會加會而無法實踐大計，但即使會議提早完結都敵唔過天氣，無法欣賞今年最大型嘅流星雨喎。
阿Ben暑假時曾經賣甩囡囡，同一班朋友去睇英仙座流星雨，所以當時就承諾會帶囡囡睇雙子座流星雨，仲早就計劃去露營，買定吊床同地墊，可謂萬事俱備，但其後立法會決定加會，已經令囡囡失望一次。
太多雲取消睇流星雨
不過，立法會提早完成審議修改《議事規則》，令到阿Ben多番時間，但點知當晚太多雲而決定取消計劃，真係人算不如天算喇！佢就大嘆，今次流星雨流星數目多，再加上撞正農曆月尾而月光較暗，直言係睇流星嘅最佳機會，好難遇上咁多有利條件，睇嚟佢同囡囡都一樣咁失望喎。