政情：梁繼昌自費 赴尼泊爾睇災後重建
尼泊爾喺二○一五年發生大地震，逾八千人罹難，無數建築被毀，當時香港政府希望成立尼泊爾賑災基金撥款五千萬元，但正值財委會拉布，最後要以傳閱模式通過撥款。事隔兩年多，當年有份促成各黨派確認撥款嘅會計界議員梁繼昌（Kenneth），趁住聖誕假期去咗當地睇災後重建工作。不過，今趟旅行Kenneth係自掏荷包，帶埋屋企人同朋友一齊去玩，使咗幾錢就話唔講喇喎。
樓房同市況回復得幾好
Kenneth話今次去玩五日，包括去首都加德滿都、帕坦同埋博克拉，主要去行吓山同睇災後重建。不過，佢就話好多古蹟都要復修，工匠要慢慢按古蹟原貌去做，大讚新造木刻仿古度高，可惜整體重建算做得慢，只係樓房做得比較快，市況回復得幾好。
尼泊爾衞生情況唔算太好，所以Kenneth話必備消毒搓手液，仲要戴口罩防塵，飲水都只係會飲樽裝水。佢仲喺當地食咗好多美食，包括羊肉、雞肉咖喱、咖喱豆泥等，佢話全部食物係有機，所以都唔怕食咗唔舒服，又話屋企人去過好多落後地方旅行，所以大家都唔怕污糟，兼且身體好強壯添！