政情：賴佔中因「欄」而起 黃之鋒滿口歪理

政總東翼前地自政總遷往添馬艦後經歷多次集會示威，包括二○一二年反國民教育集會及一三年因免費電視發牌風波而起嘅遊行集會。而喺一四年六月，立法會財務委員會審議新界東北發展計劃前期工程撥款，引發衝擊示威後，政府就喺同年七月宣布要加建圍欄。

對於新一屆政府話重開政總東翼前地，黃之鋒尋日出席電台節目時就話，當初如果唔係政總東翼前地突然未經任何立法會討論、政府諮詢下突然起咗三米高嘅圍欄，都唔會有「重奪公民廣場」事件，之後亦唔見得一定會有佔領行動發生。佢又話如果重開之後，政府以繁複嘅行政程序令遊行人士難以申請，又或者只係開放畀政府官員停車、職員進出，重開就只係「姿態大於實際」喎。

眾所周知，違法佔領行動係由「佔領中環」發起人戴耀廷因為政改而發起，而非因為政總起圍欄，而喺黃之鋒於佔領行動爆發前夕衝入政總東翼前地之前，東翼前地都仲係有限度開放。黃之鋒講到因為政府起圍欄，先至導致佔領行動，真係歪理連篇。

議員斥唔合邏輯 搵藉口開脫

立法會議員陸頌雄狠批黃之鋒不合邏輯、顛倒是非，話政府關閉政總東翼前地係因為當年黃之鋒反國教集會以及之後嘅示威集會濫用政總東翼前地，令到政府難以管理先至因為保安理由而出此下策。佢仲話黃之鋒仲有單官司係同衝擊政總有關，質疑黃之鋒係想推卸責任、諉過於人，唔想找數。另一議員葛珮帆就話，政總東翼前地過往一直開放，係因為示威者搞事，政府先至因保安問題而起道閘，黃之鋒講嘅直情係歪理，本末倒置，倒果為因，純粹為自己搵藉口開脫。

黃之鋒嘅歪理擺明係為自己衝擊政總開脫，睇嚟要畀架時光機佢，載佢回到過去睇清楚，等佢冇得狡辯至得喇！