中環出更：鄧肇殷細個好百厭 玩唇膏被趕出門罰企
小朋友鍾意模仿大人行為，尤其見到媽媽化妝都會有樣學樣，好似仁濟副主席鄧肇殷（Erica）就自爆，幾歲大嘅佢已經識拎媽媽嘅唇膏幫自己化妝，除咗將自己變花臉貓，仲當顏色筆咁用周圍畫，搞到被趕出家門罰企！
不過，Erica冇因為被罰而驚，更話之後仍然有拎媽媽嘅貴價化妝品去玩，認真百厭！但玩還玩，佢去到十幾歲就開始注重護膚，媽媽葉鍾佩雲就話從來冇教過Erica護膚，可能因為遺傳。而從事美容生意嘅佢除咗同Erica講護膚之外，竟然仲有其他更重要嘅嘢喎，原來係叫結婚冇耐嘅Erica要多啲補身，準備生BB畀佢玩囉！
區志光畀老婆命令要護膚
當日嘅活動係香港化妝品同業協會周年晚宴，保安局副局長區志光都係嘉賓之一。佢透露，自己屬於乾性皮膚，所以婚後太太就落命令要佢護膚，而佢現時每日都會用潤膚霜，絕無偷懶。另外，佢又擔心鬚後水味道太濃烈影響到其他人，所以太太就專登為佢挑選草本配方添！
協會會長郭詩慧因自小到舖頭幫手，所以早已接觸化妝品，細個都會貪玩搽指甲油。不過，佢自十歲起已經注意皮膚護理，認為皮膚需要細細個開始護理，所以即使囝囝只得五歲，都已經開始幫囝囝護膚，但佢認為保持心境開朗比護膚同飲食更重要。
郭詩慧嘅老公陳振邦就透露，初中時因為有暗瘡問題，所以就學人用青瓜敷面，但用後就覺得心理作用大過實際作用。至於護膚嘅學問，佢都係認識太太後先接觸到，仲話近年多咗紙面膜，用起上嚟方便好多喎。
卓妮