一年將盡，又係埋單計數之時。盤點港府施政，唔使問梗係走數多過食飯。早排官老爺仲實牙實齒咁話，港珠澳大橋今年底通車目標維持不變，家陣得番一個禮拜唔夠，識變魔術都唔掂喇！
本來呢，港珠澳大橋真係威過威士忌，唔單止係全球最長跨海大橋，被譽為「世界新七大奇迹」之一，其他好似主樑鋼板高達四十二萬噸嘅用量、由機械人焊接的鋼製橋樑、外海大直徑深插鋼圓筒快速築島以至海底隧道「半剛性」沉管新結構等，統統都係全世界冧巴溫，真係唔嘢小o架。
威就係夠晒威嘞，可惜有個「豬一樣嘅隊友」拖後腿，咁就講乜都嘥氣。大橋內地段工程已經進入最後大直路，連照明部分都已經喺聖誕節前完成測試，紅綠藍三色璀璨燈光襯托海豚造型橋塔，美不勝收；而珠海連接線內嘅拱北隧道，路面亦已畫上行車線，距離最後驗收可謂萬事俱備，只欠東風。反觀香港段工程，一波三折，陷入「延誤、超支、再延誤、再超支」嘅怪圈。家陣內地工程已經去到臨門一腳，香港呢邊嘅接駁同配套工程仲未跟得上，大橋通車後分分鐘廢咗一半武功。
仲有吖，大橋香港段工程進行以來，奪命工業意外不絕如縷，至今最少奪去十位工友性命，受傷嘅更加難以計數，整個工程被譏為「奈何橋」，玩吓手可能係世界造橋史上傷亡最慘重嘅一役，成就另類「世界之最」。
講真，蝸行牛步仲係其次，最怕係「慢工出劣貨」，大橋淪為豆腐渣工程，到時就真係唔慌唔佗衰家嘞。唔係危言聳聽o架，人工島飄移、海堤崩塌、填海用鋼圓筒移位……大橋工程甩漏鑊鑊新鮮鑊鑊甘；最得人驚嘅係，土木工程拓展署外判商被廉署揭發石屎檢測結果掉包造假，大橋即使順利通車，質量有冇保證，真係冇人話得埋。
你話係咪該煨吖，以前「香港速度」傲視全球，最睇唔起內地效率低下，估唔到家陣風水輪流轉，大型基建居然要「等埋香港」。搞成今時今日咁，除咗因為港產官僚能力不足，自高自大心態亦係一大問題。正如有學者話齋，以往無論粵港、穗港以至深港合作會議，內地方面都高度重視，委派專家進行大量調研工作，反觀港府好多時只係派幾個AO出席就算，咁敷衍了事，唔出事至奇。
做人最棹忌高估自己，錯估形勢。唔理港珠澳大橋抑或係廣深港高鐵，如果唔係睇中央份上，地方唔受香港玩，反而乾手淨腳，唔使添煩添亂。港產官僚繼續皇帝女唔憂嫁咁款，遲早食自己嘅咋！