政情：梁福元明年嫁女恨抱外孫
為人父母最開心就係子女結婚同生小朋友，十八鄉鄉事委員會主席梁福元快將榮升「外父」，皆因佢女兒梁苑蓉喺平安夜被求婚成功，快將註冊，並定於明年五至六月行婚禮，佢預計筵開唔少於四百五十圍盆菜大宴親朋。梁福元話嫁女相當開心，大讚未來女婿好上進，最想佢哋趁年輕快啲添丁！
話說平安夜當日，梁福元未來女婿喺大棠有機生態園向其女兒求婚。從梁福元提供嘅照片可見，未來女婿都相當有心思，安排咗多部掛有心形氣球嘅跑車，以及一架直升機，仲布置咗求婚嘅大型告示牌，上面印有甜蜜合照。
大讚未來女婿上進
梁福元話，女兒同未來女婿已經拍咗拖幾年，鄉村傳統都係想仔女趁後生盡快添丁，有老人家幫手湊小朋友，但一切都係隨緣啦！雖然未來女婿唔係原居民，但住喺新界都可以稱呼做新界人，「日久他鄉變故鄉」，仲大讚未來女婿好上進添，咁聽落佢都相當滿意喎！