政情：次輪補選戰 阿王復出呼聲高
將於明年三月舉行嘅立法會四席補選，建制派早喺大半年前已確認人選，由民建聯深水埗區議員鄭泳舜出戰九龍西補選，工聯會前立法會議員鄧家彪再戰新界東。至於之後再舉行嘅九西及新東第二輪補選，建制派亦已開始構思應該派咩人迎戰。若果鄭泳舜同鄧家彪喺首輪補選中敗陣，有人就提議換人參選，其中一個構思係搵番啲政壇老將，例如工聯會前立法會議員「阿王」王國興復出參選，希望可為選舉帶來「新氣象」，以及為二○二○年嘅立法會換屆選舉提早部署備戰。
再派鄭鄧 選民厭倦
宣誓風波先後令六名民主派議員被取消資格，其中原屬青年新政游蕙禎、梁頌恆、香港眾志羅冠聰同自決派姚松炎嘅四個議席，將率先喺明年三月補選。至於自決派劉小麗同社民連梁國雄嘅九西同新東議席，因兩人正就宣誓覆核案上訴，當局會喺官司完結後先舉行補選，估計最快要等到明年底先投到票。
根據民主派與建制派喺直選得票嘅「六四黃金比例」，嚟緊四席補選中嘅三個直選議席，各方都估計民主派候選人勝出嘅機會較高。如鄭泳舜同鄧家彪一如所料落敗，建制派再次派出兩人參加第二輪補選，可能會令選民感到厭倦，影響投票意欲。加上預計民主派會派番小麗同長毛出戰第二輪補選，將會較首輪補選嘅對手難打，鄭泳舜同鄧家彪連輸兩次會好難睇，因此就有人提出應該換人參選。
擔心新人易請難送
若然決定換人，其中一個考慮係派啲二、三線嘅新人區議員出戰，藉此提高知名度作長線部署，但建制派又擔心啲新人易請難送，輸咗補選之後又想爭取喺二○二○年嘅換屆選舉出線，打亂原有嘅接班安排，添煩添亂。反而如果改派啲本已退出政壇、無欲無求嘅老將參選，無論最後係贏定輸，要佢哋退番落嚟都易啲，甚至可利用佢哋喺補選中取得嘅剩餘支持度，於換屆選舉中為新人抬轎。
當中最多人點名嘅老將，就係去年以廿三萬高票落選嘅阿王。阿王反佔中、反港獨、反拉布嘅立場鮮明，由佢嚟對付小麗或長毛就最合適不過。阿王被問及被推薦參選第二輪補選時話，自己係首次聽到呢個說法，但佢同時維持早前對會否參加補選嘅說法，就係「義不容辭、當仁不讓、服從大局」十二個大字，由此觀之，阿王戰意依舊高昂，如果佢最後決定出戰九西，更加係首位先後參加過傳統功能界別、超級區議會選舉，以及港、九、新界地區直選嘅人士，即使最後落選，都足以喺歷史上留名！