中環出更：博愛慈善舞會 楊亞媛自製泡菜贈好友
博愛醫院董事局早前舉行博愛慈善餐舞會，大批博愛董事局成員現身支持，其中一早到場嘅博愛總理楊亞媛（Winnie）透露，最近忙住做泡菜同好友分享，事關佢自細跟着外交官媽媽派駐唔少國家，四歲時喺韓國住過幾年，所以好喜歡泡菜，仲同媽媽學咗獨門配方，逢親冬天大白菜及蘿蔔當造時，就親自下廚自製泡菜贈送各方好友喇！
本身係江蘇人嘅Winnie又話，自細曾喺唔同國家住過，除咗韓國之外，仲隨媽媽派駐過俄羅斯，唔怪得性格都好海派。佢笑稱依家呢個天時最啱做泡菜，材料除咗大白菜及蘿蔔之外，仲有蘋果、雪梨、薑、蒜頭及鹽等，醃三日就食得。
簡浩秋夫婦愛運動
Winnie教路話千祈咪落醋，事關泡菜嘅酸味係靠蘋果同雪梨發酵嘅。除咗做泡菜，Winnie仲經常做幾百底年糕分送畀長者添！
同場仲有博愛副主席陳首銘，見佢肚腩好似細咗啲，唔知做過咩嚟呢？陳首銘笑稱為咗催谷旗下酒樓生意，最近推出茶舞時段，畀啲茶客飲吓茶、跳吓舞，佢有時都跳埋一份，肚腩因而細咗。博愛永遠顧問簡浩秋及太太、副主席簡陳擷霞都好鍾意運動，簡太一向靠游水保持身段，身兼香港童軍總會演藝委員會主席嘅簡浩秋就鍾意打網球、游水，最近仲迷上打乒乓球，難怪佢身上一啲多餘脂肪都冇。
湯修齊獻唱吸善款
博愛永遠顧問湯修齊、總理藍王雲仙、總理曾向得同太太Wen等人都有到場，主席彭少衍同候任主席李鋈發忙到滿場飛。鍾意唱歌嘅湯修齊載歌載舞幫手籌款，令善款滾滾來。
卓妮