眼看他起朱樓，眼看他宴賓客，眼看他樓塌了。咪睇澳門表面風光，其實內裏污穢，衰嘢正逐步浮面。呢，日前係澳門回歸十八周年，大批市民湧上街頭表達不滿「贈興」，有人更下跪請願，回歸慶典竟然變成吐苦水大會，你話幾咁冇面！
正所謂男兒膝下有黃金，好人好姐當然唔會輕易下跪，但幾百名「海一居」苦主喺慶回歸當日遊行到政總下跪，有幾苦大「愁」深，可想而知。梗係啦，呢班苦主窮畢生積蓄買下海一居樓花，無非希望有個溫暖的家，點知澳門政府喺兩年前突然推出新政策，以土地已達二十五年期限仍未發展為由，唔該都冇聲就收番塊地，樓盤爛尾收場，最慘係唔少苦主仲要每月拎幾萬銀出嚟供「空氣樓」，簡直一殼眼淚。
嗱，呢班苦主冇嘢望，淨係望澳門政府快啲同發展商傾掂數，還番層樓畀佢哋。可惜吖，咁卑微嘅願望，澳門政府一樣話之你，仲不斷以「司法程序」做擋箭牌，拖得就拖。大佬呀，官老爺就話薪高糧準住洋樓養番狗啫，苦主就慘咯，想攞番自己嗰份之嘛，都千難萬難。冇計喇，官老爺麻木不仁，冇心冇肺，踢都唔郁，苦主就算跪到膝頭哥穿窿，都係嘥氣嘅咋。
唔係講笑，澳門政府有名你叫「特拖政府」，最叻死拖爛拖，莫講話海一居事件拖住先，就算復修一個巴士站咁簡單嘅事，都夠膽死拖足兩年。大家都知，今年八月「天鴿」吹襲澳門，死傷枕藉，其中關閘巴士總站好似豆腐渣咁一吹即散，事隔四個月仲係蓉蓉爛爛，逾廿條巴士線被迫改道，引發交通大混亂，市民怨聲載道，偏偏澳門政府你急佢唔急咁款，一味歎慢板，問你點頂。
睇到喇，連巴士站都話要復修兩年，咁「天鴿」對其他設施造成嘅破壞，睇怕都唔使旨意回復原貌咯。淨係多個被雨水沖毀嘅公共停車場咋，到家陣仲係「車屍」遍地，重災區嘅商戶更係重開無期，就知澳門政府對民生根本漠不關心。咁就唔怪得澳門當局對海關關員兩次倒掛五星旗視作等閒，對七人醫生團體遭受關員無理對待仲死雞撐飯蓋添喇，事關佢哋連市民死活都唔在乎，又點會在乎國家尊嚴同埋旅客感受吖。
一句到尾，「當官不為民做主，不如回家賣紅薯」。做官唔係小恩小惠收買人心就得o架，最緊要做實事，乜都拖餐飽，結果咪拖到民怨沸騰囉。呢，最新民調顯示澳門政府民望創下新低，多達五成三市民不滿當局改善民生不力，特拖政府知唔知醜字點寫吖！