立法會議員本身已工作一籮籮，但係民主黨（白鴿黨）議員最近仲有多一項任務，就係要為黨籌款跑數。話說該黨最近發現籌款進度有明顯落後，有新接棒嘅「乳鴿」議員承認叫座力不如多屆元老，令籌款額較以往差一截，搞到該黨要勒令黨內七位立法會議員，每人喺籌款上至少要跑數三十萬元，夾埋要有二百一十萬元。
據悉，白鴿黨近兩三年平均籌得六百萬至七百萬元，雖然今個年度仲未埋數，但係進度似乎比往年滯後，其中一個原因，係一班乳鴿議員唔夠叫座力。該黨在去年立法會選舉大換血，林卓廷、尹兆堅、鄺俊宇同許智峯一批乳鴿接棒議席，但係就接唔到劉慧卿等一眾元老嘅人脈同聲望。
以前該黨元老如劉慧卿人面甚廣，掛上立法會議員牌頭，揼下心口要籌夠數話咁易。但依家一班乳鴿，大多數係地區出身，又冇乜專業背景，籌款能力自然較為遜色。結果該黨為免籌款有閃失，就要求黨內立法會議員每人至少籌款三十萬元。林卓廷承認要為籌款跑數，又話自己去年都籌咗三十幾萬，有信心今年可以籌夠數喎。