政情：柯仔掃臘味湯包 儲糧防拉布
一年一度嘅工展會向來都係市民掃平貨嘅好時機，而民建聯亦都唔執輸，尋日拉大隊去掃貨，當中柯創盛（柯仔）未入場就話一定要買到臘味同健康湯包，除咗因為佢本身鍾意食之外，仲因為方便煮，最後佢買咗大約二百五十元臘味，包括幾隻臘鴨髀。
高佬賢買茶回敬象哥
原來佢喺立法會都有電飯煲，話日後就算遇到民主派拉布搞到開會開得耐，都唔使擔心冇嘢食，實行積穀防饑喎！
柯仔仲話，早前因修訂《議事規則》開多咗會，為支持一班隊友，黃定光（象哥）幾乎日日都請大家飲普洱茶，所以尋日佢同何俊賢（高佬賢）都買番啲茶葉回禮畀象哥。不過，高佬賢話如果真係要計嘅話，送番一櫃茶葉都唔知夠唔夠，所以送番少少算係心意咁啦！
無獨有偶，佢哋行行吓竟然撞到民政事務局局長劉江華，咁當然要問吓局長有冇咩好介紹，局長二話不說就拎咗包越南米出來，話個牌子叫「得米」，點知象哥一聽到就即刻話要買，唔知係咪因為貪個名夠晒好意頭呢？
