政情：馮宜萱年底退休 認鉛水事件有危有機
香港兩年前爆出轟動一時嘅鉛水事件，房屋署副署長（發展及建築）馮宜萱（Ada）多次代表房署受靶遭受批評。年底將退休嘅Ada接受房委會刊物《互信》訪問，回顧三十多年喺房委會嘅工作，承認有三件大事係有危有機，當中包括鉛水事件，另外兩項為短樁事件及德信事件，形容每件大事均係「火鳳凰」。
形容房署係高危「愛生事家庭」
房署嘅工作同市民息息相關，Ada接受訪問時形容自己活在高危、高風險嘅「愛生事家庭」，即使做得幾好，亦難免出現盲點，打個比喻如果同時染病，私人工程只係打噴嚏，政府工務工程可能像患上感冒，但係房委會嘅工程就變成肺癆，因此必須繼續革新、戒慎恐懼，避免重蹈覆轍！
臨別在即，Ada形容心情「百感交集」，一來依依不捨，要離開這個「生活」咗三十多年、涉及多個範疇 、一條龍嘅大家庭，同時又感恩見到呢個一手湊大嘅大家庭幾經風浪、迎難而上。Ada最後又形容依家係「開心上岸」，直言終於可以離開這個風高浪急嘅崗位嘞。