政情：梁振英「重點缺失」 區會億元項目淪爛攤

每區一億元嘅社區重點項目計劃於一三年初曝光，經過近五年時間，唔單止區議會換咗屆，連特首都換埋，但距離全部完成搞掂，仍然係漫漫長路，事關直至尋日，仍有三個區會嘅億元項目仲等緊過幾關，以便盡快到立法會財務委員會申請並獲批撥款，因此，以上三個區會最終攞唔攞到錢展開工程或服務仲係未知之數。

話說立法會民政事務委員會尋日就開會，討論呢三個區會嘅四個社區重點項目，包括觀塘海濱音樂噴泉、灣仔興建摩頓臺活動中心、以及南區為期五年嘅一次性眼科檢查，以及為行動不便人士提供穿梭巴士或復康巴士接載往公立醫院及醫療機構服務。

現僅約一成項目投入運作

民政事務局局長劉江華會上透露，十八個區議會中有二十三項撥款已獲支持，而二十三項已批撥款中就只有三項係已經投入運作，即黃大仙廣場擴闊工程、屯門青少年發展計劃、及葵青區嘅眼科、牙科健康評估。換言之，只有略多於一成已獲撥款嘅項目，市民係享用緊有關設施或受惠於相關服務，有關比例相當低。

講番尋日向民政事務委員會闖關嘅三個區會嘅億元項目，其中觀塘及灣仔嘅億元項目早前畀泛民拉布拉死，直至尋日再捲土重來「過三關」，多名建制派發言時有矛頭指向泛民拉布，甚至係越俎代庖，即有意以立法會平台推翻區議會已達成嘅共識。

議員轟撥款應用未訂指引

不過呢個世界冇無緣無故嘅爭拗，有泛民議員認為罪魁禍首係CY，正如本身係社工嘅張超雄話齋，CY當年無啦啦推出計劃，加上每區獲撥款一億元數目唔細，當局又冇指引啲錢點用，包括應該應用於硬件工程定軟件服務都唔知，搞到區議會「打餐死」，直斥呢個係CY嘅「重點缺失」。

會上最令人意想不到嘅係，多名建制派議員竟然要求現屆政府「加碼」，再推新一輪億元項目，甚至係恒常化，以後每屆區議會都獲撥款搞億元項目，完全無視經過近五年時間，首批億元項目嘅進度仍然係慘不忍睹。

還記得CY當年將「地區問題，地區解決」等口號講到天花亂墜，到頭來只係徒添地區爭拗，進一步激化撕裂對立，依家留低嘅億元項目爛攤子，現屆政府真係多得CY呢個帶挈唔少，因為一旦未執好手尾同搞掂項目，都咪使旨意有政治空間再開展類似計劃嘞！