中環出更：老婆大爆陸頌雄自細就咁激
勞工界立法會議員陸頌雄（Michael）過去於立法會多次旗幟鮮明同泛民唇槍舌劍駁火，被視為建制派新一代「重炮手」嘅潛在人選，佢早前帶埋太太出席活動時，陸太就大爆Michael自細都係咁熱血，早於就讀幼稚園已識得投訴老師，唔單止係咁，Michael呢個熱血嘅特質仲遺傳到八歲嘅兒子身上，依家已經係好活躍同成日發問。
幼稚園已經識投訴老師
Michael被踢爆原來由細到大都係咁激！話說陸太早前陪同Michael出席活動，透露早於幼稚園之時，已識得要投訴老師。陸太話從奶奶口中得知，Michael讀幼稚園時，有次講起唔鍾意某個老師，要投訴該名老師，當時奶奶就問佢點解，Michael回覆話因為老師唔畀佢講嘢喎！陸太講起都忍唔住笑，話佢好細個已經有咁嘅特色。
陸太之後又話，佢哋現年八歲嘅兒子，其實都遺傳Michael熱血嘅特質，好活躍、好多嘢問，包括曾經私下質疑老師處理事件唔公平。雖然兒子有晒家族遺傳嘅熱血特質，陸太表明唔想兒子日後做議員，因為實在太辛苦喎，希望順其自然畀兒子發展。
卓妮