《聖經》裏面有個寓言，有人要用石頭掟死妓女，耶穌回應眾人︰「你們中間誰是沒有罪的，誰就可以先拿石頭打她。」劏房母殺女倫常慘劇，全城震驚之餘，亦值得政府以至整個社會反思。
大家聽到呢單嘢嘅第一反應，除咗憤怒之外仲係憤怒，面對一個天真爛漫、活潑可愛嘅十二歲女孩，點解有人居然可以泯滅人性，狠心落手？呢方面，相信警方同法庭調查後自有公論，要負責任嘅人始終走唔甩。之但係用石頭掟死「罪人」後又如何，係咪代表類似慘劇唔會再發生？
大家可以見到，涉事母親經歷兩次婚姻失敗，獨力照顧子女，本身又係透過中港婚姻來港嘅新移民，加上住喺環境惡劣嘅劏房，又染上濫藥惡習，可以話係基層中嘅基層，弱勢中嘅弱勢，亦可以話係出事嘅高風險群體。但事實卻係，咁多年來社會對呢個家庭「零支援」，母親所謂「自力更生」，只能從事社會最底層工作，基本上同「自生自滅」冇乜分別。
當然喇，大人條路就話自己揀，再辛苦都要自己承擔啫，但稚子何辜，一朵鮮花尚未綻放就過早凋謝，怎不令人扼腕。小女孩由細到大畀人當人球咁掟，中港兩邊走，曾被迫停學及轉校，加上有個濫藥嘅阿媽，莫講話冇家庭溫暖，直頭終日活喺恐懼之下。好明顯，如果校方密切跟進，社署提早介入，就唔會搞成今日咁嘅田地。
類似政府支援嘅「漏網之魚」，社會上仲有好多。前排有位四歲孖女被虐重傷要入ICU，涉事母親就係因為經濟環境唔好，無法照顧小朋友，結果因為「所託非人」而出事。同殺女慘案唔同，呢單畸士有社署社工跟進，弊在掛一漏萬，淨係處理三母女上樓問題，完全忽略託兒需要。講真，有頭髮冇人想做瘌痢，如果政府提供足夠託兒服務，個阿媽又使乜出此下策？所以話，類似悲劇唔單止係個人嘅不幸，更加係政府嘅失職，「官不殺伯仁，伯仁因官而死」，就係咁解。
港府乜嘢都缺，就係唔缺錢，高官成日吹噓喺社福方面增加咗幾多資源，到頭來窮人愈來愈多，弱勢群體一樣係叫天不應，叫地不靈，簡直係香港呢個富裕社會之恥。話時話，上一代窮係窮啲，但勝在人情味搭夠，街坊街里守望相助，你借豉油畀我，我幫你照顧小朋友，一人行多一步，又點會好似依家咁，三日唔埋兩日一單倫常慘劇？
點講都好喇，倫常慘劇一宗都嫌多，到底仲要犧牲幾多條鮮活嘅小生命，先可以敲醒官僚麻木嘅神經，喚醒社會嘅關注？