政情：派餃子予長者 陳穎欣送飯盒度生日
以喺深水埗派發愛心飯盒而為人熟悉嘅陳灼明（明哥），尋日就聯同深水埗區議員鄭泳舜及陳穎欣，趁冬至前夕向區內長者派發愛心飯，更搞搞新意思送埋餃子添。原來陳穎欣都有定期派飯畀長者，早前生日更喺派飯中度過。
陳穎欣話，獨居長者只能夠喺周一至周五有上門送飯服務，認同明哥所指長者喺周末都需要有人送飯嘅諗法，所以其議員辦事處會喺周六全日運作，方便為區內長者派發飯盒。陳穎欣上周六生日，但佢仍然親自派飯，結果生日就低調咁過咗。
明哥冀獲資助擴服務
而明哥就話，已經喺深水埗工作六年，希望可以總結經驗將服務伸延去其他地區，但需要先得到財團資助。另外，今次活動除咗派發飯盒，亦都有向長者派餃子。明哥笑笑口話，長者可能會食厭飯盒，所以嘗試派發唔同類型嘅食物，而今次就同其他店舖合作提供餃子喎。