有「民主阿婆」之稱嘅前政務司司長陳方安生明年二月將赴美國鳳凰城拎「美嘉獎」（O'Connor Justice Prize）。不過民主阿婆去得美國又點捨得攞個獎就返嚟吖，佢講到明成個行程約兩個星期，除咗鳳凰城，仲會去埋紐約同華盛頓，將會見好多政客、智庫同傳媒喎。見咁多人，似乎佢到依家都係耐不住寂寞，到時話唔定又係去「唱衰香港」，係咁慫恿人對香港事務指指點點喇。
民主阿婆尋日喺一個茶敍時話，希望外國人要多啲關心香港，因為今時今日中國愈來愈強勢，中央政府會唔會對香港履行承諾係值得留意，仲話外國人都可以諗吓喺「一國兩制」入面扮演咩角色。真係明目張膽勾結外國勢力干預香港事務。
除咗將會去美國，其實民主阿婆較早前先去完台北旅行，原來今次係佢第一次去台灣，佢解釋，因為之前做官嘅時候唔方便去。其實佢冇做官都十幾年，遲遲都冇去，唔通真係忙住周圍唱衰香港，忙到唔得閒去？