政情：泛民未武鬥先內鬥

不過，據聞有唔少民主派議員都對展開呢場議事規則復仇戰有保留，擔心會等同向建制派送上彈藥，畀藉口對方進一步收緊其他立法會委員會嘅會議程序，甚或影響民主派喺三月立法會補選嘅選情，令佢哋得不償失。

上周通過嘅修規建議，主要喺針對立法會大會同全體委員會嘅議事程序，包括減降流會風險、限制民主派提出大量修訂或中止議案拉布等，但並無禁止議員喺全體委員會階段無限次發言。今次修規亦唔涉及財務委員會、工務小組委員會及人事編制小組委員會嘅程序，民主派可以繼續喺有關委員會，針對政府嘅撥款、工程及開設首長級職位申請進行拉布。

溫和派怕失拉布機會

為咗報復建制派成功修規剪布，有激進民主派事後就提出再次發起「不合作運動」，包括利用餘下嘅拉布手段甚至發動「武鬥」，喺大會阻撓政府法案通過，以及喺財委會及轄下兩個小組全面開戰。

不過，有溫和民主派就提出反對，認為如果佢哋一復會就發動復仇戰，只會令建制派有更大條道理，指稱今次修規內容其實唔係咁「辣」，民主派事後可繼續拉布搞事就係最佳證明。再者建制派正計劃打蛇隨棍上，進一步修改財委會《會議程序》，令民主派喺政府申請撥款方面亦難以拉布，佢哋喺呢個時間進行大反擊就中晒計，令市民更加厭惡拉布、更加支持建制派剪布。

最重要嘅係，立法會四個議席補選將於三月初投票，民主派喺一、二月進行大報復癱瘓議會，等同為建制派候選人製造選舉議題，幫自己嘅選情倒米。若最後民主派輸咗其中一個直選議席，建制派就會繼續擁有分組點票話事權，喺立法會想過乜就過乜。所以估計民主派即使想反擊，亦會忍到補選投票後先進行，或者最多只會針對高鐵一地兩檢同《國歌法》本地立法等特定議題局部開戰，唔會發動全面戰爭。