中環出更：打籃球斷腳筋 李華明坐輪椅去投票
尋日係港區全國人大代表選舉，有份投票嘅前立法會議員李華明（肥仔明）尋日就坐住輪椅現身，唔少政商界人士都上前關心佢。肥仔明話，月初打籃球搞到斷咗腳筋，喺浸會醫院住咗五日，特登租定電動輪椅嚟投票。邊個攞到佢一票，真係應該要去謝票喇！
肥仔明話，早前同朋友去咗西貢日營，「以為年紀輕」去打籃球，點知打咗十幾分鐘就出事，行路拐吓拐吓。因為工作忙，隔咗一日才去睇醫生，點知一睇就知出事，要入院做手術，之後仲要打石膏打到上膝頭，預計周六拆線，屆時就可以打少一半石膏，短途可以用拐杖支撐行走，但長途仍需坐輪椅，都要抖約一個多月。
不忘搵陳茂波汪明荃合照
不過，尋日佢坐住輪椅，都不忘同財政司司長陳茂波、藝人汪明荃等人合照，仲一早預約咗部可為輪椅使用者提供點到點接載服務嘅的士，去票站接佢離開添。
卓妮