中環出更：心淡股票勁蝕沈運龍刻意忘冧巴
早前美股升穿歷史高位，港股亦都進入大時代，好多人都有唔少斬獲。前排香港珠寶製造業廠商會（商會）舉行就職典禮暨晚宴，卓妮見到珠寶界「中東王子」沈運龍（Aaron），問佢在股市有冇獲利，估唔到向來有冒險家精神嘅Aaron，竟然好冷靜話交晒畀投資顧問全權打理，佢好少過問，只要賺到錢就得喇！Aaron對股票咁冷淡，原來係曾經有段痛苦經歷，仲搞到自己要封鎖記憶添！
Aaron話大約廿年前，佢炒股好叻，連客戶都有所耳聞，試過有美國客畀十五萬美元佢幫手投資，兩、三年後佢就連本帶利畀番七十五萬美元個朋友，即賺咗四倍咁多，諗起都覺得好威水。但係金融海嘯一役令佢勁蝕數以千萬計，個心淡晒，從此對股票冇晒興趣，仲封鎖自己記憶，連股票冧巴都刻意忘記喎。
珠寶商會置萬呎物業發展
講番商會嘅最新發展，商會新任主席杜源寧透露，商會最近喺紅磡自置近萬呎物業，準備設立「珠寶工房」，目標係集合設計、科研、鑲嵌手工藝同檢測認證等專家於同一工房下，將珠寶工藝傳承落去。對於依家樓市處於歷史高位，商會有實力斥資購置近萬呎物業，杜源寧話，最緊要係可以促進珠寶界持續發展。
同場仲有唔少中華出入口商會中人，包括秘書長陳勁個仔、常董陳少山及會董梁煒茵等人，原來眾人都係去支持做珠寶生意嘅中華出入口商會副秘書長楊靜。此外，中華廠商聯合會候任會長吳宏斌個仔吳景瀚亦「升呢」做商會副主席，難怪佢好少公開露面嘅太太Vicky都現身撐老公喇。
卓妮