有人話，十年前喺內地辨認香港人，可以睇吓邊個孭背囊通街走，十年後嘅今日，就要睇吓邊個仲帶銀包出街。冇錯嘞，包括「支付寶」在內嘅中國新四大發明威遍全世界，香港喺呢方面落後好多年；港府到依家至話發展「智慧城市」，更加係慢咗幾拍。
港府尋日公布香港智慧城市藍圖，聲稱要喺「智慧出行」、「智慧生活」、「智慧環境」、「智慧市民」、「智慧政府」以及「智慧經濟」等六個範疇，五年內將香港構建成世界領先智慧城市，又話要利用創新及科技提升城市管理成效，增強香港嘅吸引力同可持續發展，係威係勢咁款。
呢嗱，驟耳聽好似有紋有路，面面俱到，睇真啲原來只係炒冷飯。正如立法會資訊科技界議員話齋，呢份所謂「藍圖」將上屆政府《施政報告》內容照抄一次，驚喜欠奉，反而之前顧問研究重點提出嘅支援共享經濟以及開放數據等，就未有着墨，取態過於保守。仲有吖，唔知係咪官僚貪意頭，覺得「六六無窮」、「六六大順」好聽啲，明明「出行」就係「生活」嘅一部分，係都要拆成兩項，你話係咪搞笑吖。
講開炒冷飯，藍圖提出嘅其中一個措施，居然係兩年後就中環及鄰近地區嘅電子道路收費先導計劃制訂詳情，並諮詢公眾意見。咪玩啦，電子道路收費大大話話講咗幾十年，諮詢都諮詢過N次，官老爺倉底貨當新嘢sell，點止炒冷飯咁簡單，直頭湊數交功課喇。
話時話，智慧城市外國已經講咗好多年，有唔少經驗可以借鑑，港府站在巨人的肩膊上，理應提出更多具創意嘅點子。可惜事實啱啱相反，部分措施好似多功能智慧燈柱，收集實時城市數據等等，外國一早行緊，淨係「拿來主義」，牛頭角順嫂都識，使乜高薪厚祿養你班大帝。
當然喇，有心唔怕遲，十月都係拜年時。港府依家急起直追，總好過翹埋雙手等運到，最怕官老爺又係頭腦發熱，講咗當做咗。大家有眼見，兩年前港府話要將九龍東打造成「智慧城市」，結果雷大雨小，連最基本用手機App提供區內停車場空置車位數目都做唔到。今年《施政報告》，當局大肆吹噓「WiFi連通城市」計劃如何成功，查實好多地方上網速度仲係慢如烏龜。家陣創科局局長楊偉雄又封定後門，衡量智慧城市發展唔會有「硬指標」，有幾大誠意同決心，不問可知。
火車不是推的，牛皮不是吹的。睇吓人哋深圳，發展創科埋頭苦幹，一步一腳印，短短時日已經贏得中國硅谷美譽，好心港產官僚學吓嘢喇！