政情：公民講場：與譚文豪心心相印？ 謝偉俊「男男」自語

立法會近日審議修改《議事規則》火花四濺，理應係敵對陣營嘅公民黨譚文豪同建制派謝偉俊，雙方竟然喺陣前大搞曖昧。繼前日譚文豪在發言時突然提到謝偉俊當年喺中環着泳褲半裸舉牌抗議律師會一事，尋日就輪到謝偉俊反問譚文豪係咪迷戀佢，又以「親家」、微妙關係去形容兩人嘅關係，最後更指自己同對方心心相印添，聽到毛管都戙埋！不過，譚文豪就唔多領情，話唔想同謝偉俊嘅女友白姐姐去爭奪正印地位，仲強調自己有家室添！立法會主席梁君彥都冇眼睇，表明唔會理會兩人關係，其他議員就梗係笑住食花生睇戲啦！