政情：楊哲安被家人勸阻 少玩咗刺激運動
唔少年輕人為咗追求刺激，都會鍾意玩極限運動，好似笨豬跳、跳傘、攀岩等，好似中西區區議員楊哲安（Jeremy）最近都為慈善進行高空游繩，佢話鍾意玩呢類刺激運動，但近年因為家人勸阻，所以都已經少咗玩喇。
為慈善高空游繩
Jeremy表示，新西蘭為笨豬跳原產地，佢就試過同哥哥楊哲寧，兩個人喺當地攬住一齊玩笨豬跳，睇嚟兩兄弟都鍾意尋求刺激。除咗笨豬跳，佢仲話鍾意攀牆，不論室內定室外都有爬過，更試過去桂林攀天然岩石，真係估唔到佢咁夠膽。
不過，Jeremy就透露至今仍未玩過跳傘，因為有次想玩就被屋企人勸阻，所以自此玩有危險性嘅運動數量都減少，直言佢好難說服屋企人批准佢為玩而冒險，但如果為慈善就唔同講法喇。