政情：選票資助派錢無期港獨分子拖窮議員
參加立法會選舉財力同物力都唔少得，候選人動輒花費過百萬元選舉開支。根據現行條例，立法會選舉候選人若當選或取得百分之五以上有效選票，就可以取得每票十四元嘅資助，算係幫補吓開支。不過，由於去年嘅立法會換屆選舉中，香港島、新界東同新界西三個地方選區都有人提出選舉呈請，以致選舉事務處至今都未找數畀呢三區嘅候選人，真係分分鐘拖到今屆立法會完結，到時換屆選舉又再展開，被拖住一大筆數都應該幾頭痕。
選舉呈請拖累進度
根據《立法會條例》，如有人已就某地方選區選舉提交選舉呈請書，總選舉事務主任就唔可以向該選區嘅候選人支付任何選票資助，直至該呈請書被裁定、撤回或終止。
逾1700萬元待發放
而去年九月立法會選舉，參選新界東的本土民主前線梁天琦、參選新界西的香港民族黨陳浩天、以及參選香港島的保守黨賴綺雯都分別提出選舉呈請，由於呈請至今未有定案，搞到三區的合資格候選人至今未獲發還選票資助。
選舉事務處就話，香港島、新界西及新界東地方選區因選舉呈請，故尚未發放選票資助，三區未支付的資助額分別約為四百六十一萬元、六百七十三萬元及六百零六萬元，合共一千七百四十萬元。而呢三區已分別有八個、九個及十個候選人名單提交資助申索，該處會等待選舉呈請獲處理後，就會盡快向有關候選人名單發放資助。
去年立法會選舉嘅「票王」、本土派議員朱凱廸正正屬於新界西選區，取得八萬四千多票，按每票十四元計算，可獲發還逾一百一十七萬元資助。雖然朱凱廸花費約百萬元選舉開支，但佢獲得嘅選舉捐贈已足夠支付，即係唔等錢使，佢仲話如果獲發還資助，都想幫助有意參選二○一九年區議會選舉嘅新界西盟友。
至於新界東議員葛珮帆就話，佢同黨友嘅大部分選舉開支都係所屬嘅民建聯負責，如果攞得番資助都係交還給黨，而該黨開支一向都大，經濟壓力真係幾時都有，如果換屆都未填得番條舊數咁就大件事喇。而香港島嘅民主黨議員許智峯，其五十多萬元資助亦係未收到，佢大呻參選時向黨借咗錢，現時每月都要還大約兩萬元，真係要「死慳死抵」。難怪唔少議員都呻話，今次真係畀班港獨分子玩殘。