中環出更：立會紀念品預示議規通過日期？
立法會設有紀念品售賣部，畀到訪嘅市民可以選購特色紀念品留念，除咗明信片、文具等，就連《議事規則》都有發售，盛惠一百六十元，但據聞現貨已經售罄，需要訂購。適逢立法會過去兩星期審議修改《議事規則》議案，而議案尋日通過，全本《議事規則》都要修改。有消息話，如果喺今日前訂購嘅話，所買到嘅《議事規則》會係未修正嘅舊版本。
早前立法會主席梁君彥為趕及聖誕節前的「死線」，決定喺尋日、今日同下周一（18日）加開會議審議《議事規則》，雖然《議事規則》順利喺尋日通過咗，但事前冇人知幾時通過到，就連建制派都唔敢講實尋日傍晚可以通過，所以如果上述消息屬實，係咪意味立法會已預示到表決同通過日期會係尋日呢？
議員趕尾班車購舊議規
早前有議員為趕「尾班車」，在現貨售罄前已購入一本《議事規則》。適逢紀念品售賣部正進行聖誕大優惠，多項紀念品有減價，但《議事規則》就冇優惠，所以啲民主派議員撕爛《議事規則》洩憤，成本都幾高。
卓妮