人事有代謝，往來成古今。本來呢，人事更迭正常不過，每個機構都會發生，偏偏發生喺港大就是非多多，爭拗不斷，都咪話唔邪門，尤其係校長位置，由鄭耀宗到徐立之再到馬斐森，冇人做得長，想唔話係三煞位都唔得喇。
就講馬斐森呢位洋校長，任內人事風波一鑊接一鑊，港大國際排名跌跌不休，終於冇鞋挽屐走。至於新校長花落誰家，雖然家吓未有定案，但內地出生嘅美籍華裔科學家張翔，貴為遴選委員會唯一推薦嘅候選人，已獲安排明日同港大教職員、學生、舊生及校委會見面，睇嚟校長呢個位實食冇黐牙咯。
不過講係咁講咋，係人都知港大係反對派大本營，學生衝擊校委會亦唔係第一次，已經有學生及教職員開到口話會面時間太倉卒，批評校方冇誠意，仲質疑張翔有紅色背景兼欠缺大學管理經驗，冇資格做校長喎，到時會唔會刻意刁難候任人選，會唔會又爆發混亂場面，真係冇人講得埋o架。
嗱，好似身兼遴選委員會成員嘅立法會教育界議員葉建源吖，一早講明冇投票畀張翔，擺出戰鬥格，可見新校長要坐穩個位一啲都唔容易。之但係張翔係咪真係咁不濟先？答案當然唔係喇，淨係佢份履歷已經夠晒「靚仔」，既係美國加州大學柏克萊分校博士，又係美國、大陸及台灣的科學院院士，由佢研發嘅納米隱形物料更被《時代》雜誌選為十大科學發明，去年仲獲得工程科學界最重要獎項添，過往有五個諾貝爾獎得主都得過呢個獎o架，來頭絕對唔嘢小。
咁當然，為反而反不嬲係反對派指定動作，雞蛋裏挑骨頭一啲都唔出奇，好似話張翔冇大學管理經驗喎，根本不值一駁，事關佢哋最推崇嘅美國，現任總統特朗普一樣冇從政經驗。講到尾，反對派都係不滿張翔同內地關係密切，又主張港大同內地大學合作發展科研啫。梗係喇，兩地大學一旦融合，學生見識多咗，唔再相信反中亂港嗰一套，反對派分分鐘冇碇企吖嘛。
講真，內地科技發展一日千里，反而香港愈來愈退步，加緊同內地合作，有百利而無一害。再講吖，港府一直迷信洋和尚會唸經，但事實擺在眼前，洋人唔係特別高級、特別巴閉，淨係西九文化區咋，請親都係洋總裁，冇個做得長不特止，西九做極唔起先至最大鑊。咁你話喇，與其乜都盲反一餐，點解唔畀機會中國人當家作主喎。
冇計喇，香港冇嘢多，洋奴漢奸最多。有啲人硬係鍾意崇洋媚外，硬係睇唔起自家中國人，呢鋪癮點戒都戒唔甩，諗落都幾悲哀。