政情：劉夢熊挑戰中央 傳列「不能投」名單

唔知醜曾坐監仍參選

劉夢熊早前表明獲得的三十一個提名中，連曾蔭權都有份，似乎毫無避忌咁周圍唱。曾蔭權早前亦因公職人員行為失當罪成被判囚二十個月，已經坐咗兩個幾月監，目前保釋等候上訴，可謂係戴罪之身，而劉夢熊較早前因妨礙司法公正罪成而被判囚十八個月，今年初先至出獄，真係患難見真情！不過，講開又講，根據規定，監禁三個月以上就五年不能參選立法會，估唔到全國人大代表選舉嘅參選規矩寬鬆咁多。

早前流傳劉夢熊會被取消參選資格，但尋日出乎意料畀佢入到圍做候選人，不過有得參選都未必一定選到，皆因佢嘅政綱相當出位，其中值得留意嘅係要求全國人大常委會撤銷「八三一框架」，讓香港盡快重啟政改，故被外界視為挑戰中央，有傳有關方面早已向各界表明不能投票畀佢，將佢列入「不能投」嘅名單，睇怕今次都係陪跑居多。

傳林新強不在推薦名單

尋日主席團確認嘅候選人名單共有四十九人，有傳八人不獲祝福，除了盛傳劉夢熊被列入「不能投」名單外，其餘七人之中，據知香港律師會前會長林新強、立橋金融集團行政總裁詹美清等，都不在有關方面嘅推薦名單之上，喺全票制下，估計當選無望。而被列入推薦名單的四十一位候選人，下周二將會喺港區全國人大代表選舉會議第二次全體會議中，真正競逐三十六名港區全國人大代表席位。

此外，選舉主席團共取消十人的參選資格，不能成為候選人，包括一人冇遞交十個提名、一人冇簽登記表聲明、八人明顯違反登記表聲明內容的言行，相信包括早前表明不會簽聲明的立法會議員郭家麒、已經解散的香港民進黨主席楊繼昌及傘後組織「鳩嗚團」七名成員。郭家麒話，如果真的被取消參選資格，認為無助中港融合。