中環出更:三千萬買豪宅 陳家強唔認自打嘴巴

本港樓市長處高位,財經事務及庫務局前局長陳家強今年上半年仍然再三提醒市民留意樓市風險,今年中佢仍然話樓價遠超市民購買力。不過,陳家強卸下官職唔夠半年,即以個人名義入市,上月就以近三千四百萬元豪購中半山一個豪宅單位連兩個車位,唔通佢覺得樓市有大轉變、愈升愈有?陳家強接受本報查詢時話,今次買樓係自住,無辦法之下才「冒住風險」入市,否認係「打倒昨日的我」。

屬首置免捱辣招

根據陳家強離任前嘅利益申報,今年六月底時佢未持有任何物業,而佢妻子同屋企人就分別喺灣仔區同中西區持有物業用作自住用途。換言之,陳家強今次買樓,係首次置業,不須繳付樓市辣招稅項。根據土地註冊處資料顯示,陳家強以三千三百九十三萬元買入中半山珀苑中層B室連兩個車位,樓齡三十幾年,單位實用面積一千四百零四呎,實用呎價超過兩萬四千元。

卓妮

第一手消息請下載on.cc東網iPhone/iPad/Android/Windows Phone Apps