中環出更：紀律部門阿頭 瞓身撐慈善跑
協助內地貧困白內障患者嘅「健康快車」火車醫院，早前舉辦慈善跑步行，多個紀律部門嘅阿頭都有到場支持，包括海關關長鄧以海、懲教署署長林國良、入境處處長曾國衛等，連保安局前局長李少光都有出席，個個都走足全程，果然係紀律部隊出身。健康快車創會主席方黃吉雯就話今年籌款額破紀錄達到二百九十萬元，期望之後每一年都可以打破紀錄。
鄧以海堅持做運動
入紀律部隊學堂時，狀態自然弗到漏油，即使做到部門之首，鄧以海仍然會堅持做運動流吓汗，佢話無論幾忙，每個星期都會搵一日去會所游水，所以行兩步絕對無問題。相對嚟講，林國良就承認近期工作量實在太多，無乜時間運動，被問到係咪太多民主派議員去懲教院所「公務探訪」時，佢就笑而不答。
曾國衛自爆「職業病」
至於曾國衛就話最鍾意跑步，早年仲會特登搭飛機去澳洲參加當地賽事跑個夠添；佢又話除咗跑步，亦好鍾意去旅行周圍飛，而佢每次經過其他國家嘅出入境關口時，都會職業病發作，留意吓當地入境部門嘅做法，搞到屋企人要提佢「唔好頭擰擰」，以免被人誤以為佢作賊心虛，要檢查佢行李。
至於同場嘅警務處副處長（管理）趙慧賢就自爆同「四點鐘許Sir」許鎮德打羽毛球，但完全唔夠對方打，又話細個已經開始打羽毛球，但係冇受過專業訓練，但佢囝囝就有跟教練學，所以佢有時都會落去監場兼偷師，學番一招半式之後就會向許Sir挑戰喎。
卓妮