政情：頸傷缺席拉票 林新強否認棄選人大

瞓厲頸求醫 證肌肉發炎

林新強就話，自己只係因為早前「瞓厲頸」，搞到要入醫院休息，強調自己並無放棄選舉。

林新強尋日接受訪問時就話，佢早前離港公幹，但係就喺酒店「瞓厲頸」，起初佢都不以為然，但點知過咗幾日後頸痛嘅情況愈來愈嚴重，即使戴上頸箍都冇改善。佢形容就連「搭的士架車轉彎條頸都會痛」，最終佢都係頂唔順，決定入院求醫。醫生就證實咗佢係肌肉發炎，要休息幾日。

外界有傳林新強並唔係喺港區人大選舉嘅「祝福名單」上，所以林新強喺拉票期「消失」就惹來棄選疑雲。林新強就否認自己棄選，仲話喺養傷期間都有叫同事攜同自己嘅親筆信去拜訪選委拉票，而佢養完傷之後就會立刻親身去拉票o架喇。