政情：吳得掂「累街坊」 楊潤雄唔敢外訪
政府高官不時都要到世界各地進行公務訪問，包括出席會議、論壇等交流活動。不過，上屆政府部分局長頻頻去交流，幾乎外訪多過喺香港而為人詬病，特別係教育局前局長吳克儉（吳得掂），五年任期外訪多達六十次，真係個個月冇走雞。接替吳得掂嘅新局長楊潤雄，見到前上司吳得掂因為密密外訪搞到負評纍纍，就驚青到唔敢去外訪，上任差唔多五個月以來，除咗去過一次北京進行禮節性訪問之外，就再冇外訪過喇。
就任至今僅上京禮節性訪問
吳得掂在任局長時頻頻外訪，對遊山玩水亦好有心得，曾經在公開場合分享過去日本賞櫻花同買雜誌嘅經歷。當吳得掂出遊時，喺香港署任局長一職嘅就正正係當時仲係副局長嘅楊潤雄。有位外訪多到被外界揶揄為「旅遊局長」嘅前上司，楊潤雄甫上任時已經表明作風，話自己會以香港工作優先，有需要先至外訪，又話就算係有公務外訪都可以叫同事去，加上吳得掂喺對外聯繫都已經做好咗「基礎」，相信自己都唔使成日外訪咁話。
楊潤雄果然係「言出必行」，今年七月升任局長至今，只係因公務離開過香港一次，仲要只係九月去北京三日，進行禮節性會面。唔通佢真係驚青得咁緊要，不惜斬腳趾避沙蟲？其實外訪都係局長職責範疇之一，據聞有人就提醒楊潤雄，話如果有需要都係要去外訪，因為香港作為一個國際城市，如果有國際會議唔出席都唔係咁好，而且都要畀外界了解香港嘅情況、政府嘅工作等。
據了解，楊潤雄已計劃一月去倫敦出席世界教育論壇，呢個係世界最大型嘅教育及技術部長聚會。雖然教育局有唔少燙手山芋要處理，包括今年五月已完成嘅「改良版」TSA，即小三基本能力評估研究計劃（BCA），以及將中史科定為初中必修科等。不過，由於BCA及中史獨立成科都要等相關研究報告出爐，所以暫時都唔會有好大進展，相信楊潤雄行開幾日都影響唔大嘅。