中環出更：周庭為趕及補選急棄英籍
公開表示積極考慮參選立法會香港島議席補選嘅香港眾志常委周庭，早前自爆擁有英國居留權，佢尋日出席活動時就再為其英籍解畫，話係父母幫佢申領嘅，又話已經去信英國辦理放棄英籍手續。周庭話，其英籍係幾歲時由父母幫佢申領，佢當時年紀太細，所以無份參與決定。
未知能否及時完成手續
由於法例規定立法會地區直選議員唔可以擁有外國居留權，故積極考慮參選香港島議席補選嘅周庭必須放棄英籍，而佢就話已經去信英國當局，但放棄手續仍然處理中。不過，係咪趕得切喺補選前完成放棄英籍手續，咁就唔知喇。
另外，香港眾志尋日發聲明，話會支持因宣誓風波而喪失議員資格嘅姚松炎同工黨郭永健，分別出戰民主派嘅九龍西同新界東嘅補選初選。周庭話姚松炎就任議員時成功揭破政府惡行，而工黨則係社運好友，所以會全力支持兩人參選。
卓妮