中環出更：去非洲前接種疫苗 藍國慶飲多咗「打敗仗」
臨近聖誕，政商界人士除咗忙於公務之外，仲要趕場出席唔少應酬活動，休息不足好容易累倒。善德基金會早前提早舉行聖誕晚宴，身兼善德副主席嘅塞內加爾駐港名譽領事藍國慶都有到場，卓妮見佢好似有啲攰，原來佢幾日前接種咗黃熱病、瘧疾等四種疫苗，準備去非洲，原本冇乜特別不適，但係有次出席晚宴時飲多咗酒，咁就「嚟料」喇！
藍國慶話，佢要去塞內加爾進行出任名譽領事後嘅首次訪問，所以打定幾支疫苗。近日覺得有啲攰，仲有少少發燒，於是打電話去衞生署查詢，被告知疫苗喺潛伏期內出現輕微反應係正常，所以就放心啲。佢笑稱自己身體健壯，原本都抵受到，但係連日來實在太忙，加上飲多咗酒，結果潛伏期就嚟完結先至打敗仗。
好友相聚晚宴 零舍盡興
最近塞內加爾廣為人知，事關該國前外長捲入民政事務局前局長何志平嘅行賄傳聞，藍國慶笑笑口話，最近多咗好多朋友問佢發生咩事，原本大家唔係好認識呢個非洲國家，依家因為咁嘅事而被更多香港人識，都冇壞喎！
出席晚宴嘅仲有浸會大學校長錢大康、善德主席董吳玲玲及老公董中浩、副主席洪光汜、鄭穩偉及蕭何元鳳，仲有博愛醫院永遠顧問王惠棋、副主席李柏成及總理梁天富等人。生產健康寢具相關產品嘅上市公司主席林志凡都去趁熱鬧，佢同董太係福建鄉親，一班啱傾又啱玩嘅好友相聚，零舍盡興。
董太就話，佢哋一班老友前一日啱啱行山嚟，為基金會嘅年度重點活動「善德遠足百萬行」籌款，今次係連續第三年舉辦，三年來總共行咗八條路線，年年都唔同，佢話透過活動知道香港有好多好靚嘅行山徑，大家應該珍惜，多啲去行吓喇！
卓妮