政情：最佳聖誕禮物 梁栢賢憶恩師推薦信

40年前獲鼓勵赴澳升學

梁栢賢早前上載過陳年學生相，畀網民話佢個樣「四十年不變」，佢前晚就再喺社交網站分享「禮物」。事緣四十年前，佢計劃去澳洲升學，當時佢就問班主任Francis McGaley（歐陽理神父）意見。當時班主任就同佢講︰「Go！（去）」，認為出國可以擴闊眼界，令人生經歷更豐富。班主任仲叮囑佢學成之後要返嚟服務社會。而喺梁栢賢詢問意見後，班主任亦親手寫咗呢封推薦信畀佢。梁栢賢話信中內含感恩同鼓勵嘅字句，令佢一生難忘。

唔少網民睇完都留言話好感動，又話梁栢賢實現咗老師嘅說話，回饋社會，亦有網民轉貼咗有關歐陽理神父早年病逝嘅消息。梁栢賢就回應自己都好想念班主任，仲讚佢係一個好老師。