政情：鄭泳舜餵高永文食湯圓

前食物及衞生局局長高永文雖然離開咗熱廚房，但仍然不時入真實嘅廚房下廚，大顯身手。尋日佢就與深水埗區議員鄭泳舜（Vincent）一齊下廚，大煮好意頭嘅餸菜，兩人睇嚟合作無間，而且感情非常好，事關Vincent當眾餵高永文食湯圓添！

九龍西潮汕文化節過幾日將會舉行，高永文同Vincent兩位「家己冷」就擔任活動大使，齊齊合作烹調寓意順順利利嘅豬脷冬筍煲同埋潮式湯圓。Vincent最後更餵高永文食代表甜甜蜜蜜嘅湯圓，兩人唔止用同一支匙羹，仲互餵多過一次，好彩兩人都早已有另一半，唔係分分鐘惹起Hehe疑雲喇！

高永文尋日煮嘅冬筍同佢平日煮法唔同，因為佢慣用蝦米、瑤柱及乾魷魚等材料，話希望將來有機會示範呢味拿手好菜喎。而Vincent就話以前曾到外國生活，所以都識煮菜芯炒牛肉、番茄炒蛋等簡單餸菜，難怪佢笑言識食多過識煮喇！