政情：今日你上鏡：瑞典王子勁親民 訪港搭港鐵
王子駕到！講緊嘅係瑞典王子卡爾．菲利普（Prince Carl Philip），佢專誠嚟香港為喺圓方舉行嘅攝影展主持開幕禮。雖然貴為王子，但係佢好親民，亦相當平民化，仲同港鐵主席馬時亨等人同市民一齊搭港鐵，由九龍站搭到香港站添！馬時亨仲特別送咗張為王子度身訂造嘅港鐵車飛畀王子，之後一行人又喺香港站參觀文化展品。
為攝影展主持開幕禮
菲利普王子今次到訪，主要係為瑞典攝影師約翰．巴夫曼屢獲殊榮嘅「瑞典爸爸」攝影項目主持開幕禮，呢項攝影項目主要係宣揚父母對子女嘅關愛，藉此啟發更多父親反思喺孩子成長過程中嘅角色，王子都係身為人父，當然感受好深。
攝影展顧名思義講父子情，馬時亨亦攞咗一張舊照喺現場播放，相中兩個小朋友就係馬時亨嘅女兒。