政情：聲音導航購物城 象哥講極都未到
經過多次延期後，立法會議員黃定光（象哥）牽頭搞嘅新田邊境購物城即將進行試業，而佢更急不及待以聲音導航作介紹。象哥喺片頭已經話購物城近在咫尺，又話隔一條馬路就到，結果要講到第三次「近在咫尺」先抵達正門入口。
重點介紹廁所
由於購物城仍然籌備當中，因此喺短片中只見到吉舖處處，象哥話購物城嘅間隔可以按需要改變，非常有彈性。由於購物城內只有空置舖位，故已完工嘅廁所成為象哥介紹嘅重點。象哥入男廁拍攝之際，碰巧有一名男士行出嚟，好彩冇造成尷尬。
行完男廁，象哥介紹埋女廁，指購物城嘅女廁有坐式同蹲式坐廁，笑言可滿足內地人嘅習慣，仲話可體現一國兩制添！