政情：廠商會選副會長明爭暗鬥爭崩頭

由會董票選 下周二截止報名

隨着新任廠商會會長人選塵埃落定，由吳宏斌以九成七得票率高票當選，明年一月正式上任，而下一場選戰將會係九名廠商會副會長人選誰屬，據悉早前當選嘅一百一十名會董，將會以一人一票選出九名新任廠商會副會長，而新任副會長選舉嘅報名截止時間為下周二（12日）。

消息指，現任九名廠商會副會長中，撇除史立德等三名現任副會長爭取連任，預料會有六個副會長空缺，包括廠商會第一副會長陳淑玲、廠商會第二副會長兼立法會議員吳永嘉雙雙退下火線騰出空缺；至於棄選會長嘅徐炳光，以及於會董選舉意外落選嘅戴澤良亦無望進身廠商會領導層，因此掀起廠商會領導層一個大換班。

料有6空缺 至少有7人競爭

雖然依家已報名完整嘅廠商會副會長名單尚未曝光，綜合多方消息指，依家最少有七人已浮上水面競爭六個副會長空缺，其中有兩人屬於吳宏斌競逐會長陣營嘅核心成員，包括現任常務會董陳國民及吳國安，二人再上一層樓嘅機會被看高一線；另有四人係現任常務會董尋求「升呢」，包括盧金榮、沈運龍、劉文煒及黃震，最後已曝光嘅一人還有現任會董馬介欽。

還記得新任廠商會會長之爭曾發生唔少風雨，吳宏斌當選會長後都有意做好大團結工作，表明選舉過後大家都係一家人，希望大家和和諧諧，有政界中人分析今次九名副會長人選花落誰家，並會呈現一個點樣嘅勢力分布，將會係廠商會內部能否大和解嘅重要指標，最終答案將於下周四揭盅。