中環出更：袁彌昌話冇提「郁」 葉劉：仍覺受恐嚇
新民黨立法會議員葉劉淑儀日前自爆，被領展派出身兼《蘋果日報》專欄作家嘅公共政策顧問李兆富，透過該黨政策總裁袁彌昌，以言語恐嚇她。袁彌昌尋日出席電台節目時話，李兆富當日冇用「郁、搞、收手」嘅字眼，但佢認為李嘅訊息清晰，且有警告同提醒嘅意味，而葉劉就話記唔起當日聽到嘅「Exact wording」（確實措詞），但按佢理解就係「再唔收手，你啲區議員就會有麻煩」嘅意思，亦「即係郁我」嘅意思，認為自己正受恐嚇。
認為將事件公開較安全
葉劉淑儀透露，佢曾重新檢查事件發生嘅先後次序，指袁彌昌喺上月十四日出席討論共享經濟嘅會議，二十日喺黨會後袁彌昌就向佢轉述李兆富嘅意思，令佢感覺受到威嚇，由於擔心自己會錯意，所以喺二十七日再次同袁彌昌詳談有關事宜，佢仍然認為自己正受恐嚇。
佢又指警方已接觸佢，亦會接受警方協助，又指鑑於佢喺立法會多個事務委員會跟進領展出售商場嘅事宜，所以佢認為將事件公開較為安全，雖不打算主動報警，但現時警方願意協助她，佢表示歡迎。
保安局局長李家超亦話警方已開始處理，強調任何人無論以任何方式向第三者作出恐嚇說話，即有可能違反香港法律。
卓妮