張老師的學校最近增聘了人手，教員室變得有點擠迫，令他經常感到空氣侷促，遂向負責校內設施管理的同事聰仔反映。
張老師：「聰仔，自從教員室多咗人之後，變得逼咗，我仲成日覺得好焗、好疲倦、好易瞌眼瞓，搞到成個人冇晒精神，工作效率都低晒。」
聰仔：「咁可能同教員室通風系統有關，等我搵人檢查吓。」
於是聰仔找了一間合資格的通風系統保養公司檢查教員室通風系統。
維修師傅檢查後對聰仔說：「通風系統嘅隔塵網、風扇、冷凍管同通風管道都好污糟同鋪滿積塵，咁樣會降低室內換氣速率，影響空氣流通。而且，亦會令細菌孳生積存，影響教員室空氣質素。」
聰仔：「係呀，有同事反映，教員室多咗人之後，變得非常翳焗，仲唔夠新鮮空氣。」
維修師傅回答：「教員室內每個人都會呼出二氧化碳，人多咗，二氧化碳濃度自然高咗，缺乏良好通風環境下，自然會覺得侷促、倦睡、甚至不適。根據建議，喺開放式空調辦公室，新鮮空氣供應量應該最少為每人每分鐘零點四三立方米。所以，當人多咗就可能需要改善通風系統，增加換氣速率，以及新鮮空氣既供應。」
聰仔：「明白晒，當然唔少得就係定期檢查、清洗、維修及測試通風系統，確保運作正常啦！」
職業安全健康局
www.oshc.org.hk