政情：新東開議辦陸頌雄空降做保彪
工聯會嘅立法會勞工界陸頌雄尋日喺大埔富善邨新開咗一個議員辦事處，原來嗰度前身係人民力量立法會議員陳志全嘅議辦，對方其後冇續租，陸頌雄就乘機申請咗，佢身兼元朗區議員，本身屬於新界西，空降新界東開議辦，唔通想幫盛傳會參加新東補選嘅黨友鄧家彪（Bill）喺新東落腳？
郭永健宣布參與泛民初選
陸頌雄話自己連致詞都講「三個目『標』」，同Bill係好兄弟，亦希望開拓大埔，原來佢依家喺港島區已有議辦落咗名，喺新界西原本就有議辦。被問到係咪鋪路將來轉去參加俗稱「超級區議會」選舉呢？佢就話依家未有考慮，都係先做好勞工界嘅工作。
欲染指新東補選嘅新任工黨主席郭永健尋日亦宣布將參與泛民初選，佢批評立法會選舉要求參選人須簽署擁護《基本法》確認書嘅內容唔合理，過去該黨未曾簽署，自己若勝出初選，傾向唔簽署確認書，但最終需與黨內成員商討。
至於九龍西補選方面，被取消立法會議員資格嘅姚松炎尋日終於承認積極考慮參與初選，而民主黨特別中委會尋日亦通過由深水埗區議員袁海文參與初選。