中環出更：考量人生次序 張雲正為母棄官場
政界流傳，出名孝順嘅公務員事務局前局長張雲正，為照顧媽媽而放棄做政務司司長。張雲正接受母校聖類斯中學師弟嘅訪問時話，自己考慮「未來嘅五年，究竟我媽媽嘅五年珍貴啲，定我自己嘅五年珍貴啲呢」？最終決定離開官場。
張雲正話媽媽已九十五歲，身體雖然仍然好，但其他機能都會退化，佢問自己，人生嘅先後次序應該點排，亦有同家姐及大姐夫商討，其後決定離開官場，多花時間陪媽媽。訪問喺張雲正結婚前進行，佢提到媽媽最希望佢成家立室，同佢講「我驚我老咗冇人照顧你呀」，所以自己亦盡快完成任務，依家最想陪媽媽去加拿大旅行見吓親戚，亦希望為媽媽搵中文流利及識照顧長者嘅家傭。
曾想做律師 終攻讀電腦
佢又憶述，爸爸當年好遲先發現患上癌症，喺佢十四歲嗰年嘅十二月，神父有一日到足球場搵佢，同佢講爸爸當日會過身，佢仲記得當時神父亦都好傷心。
至於後來去外國讀書，張雲正話會考成績唔太理想，無法升讀原校，媽媽賣咗一間物業供佢去外國讀書，自此以後，佢知道自己唔可以失敗，自己鍾意讀文科，心底想做律師，但一直唔敢講，因為媽媽唔鍾意佢做律師，最終佢選擇讀電腦。
卓妮