中環出更：收藏太多周樹堂推沉香平民化
香港品牌總商會（商會）早前舉行就職典禮，卓妮見到「沉香大王」周樹堂，問起點解要將貴價沉香平民化，佢竟然話因為兩代累積嘅心血收藏愈嚟愈多，搞唔掂喎。
周樹堂係新世界集團已故創辦人鄭裕彤嘅舅仔，佢話爸爸周至元除咗創辦周大福之外，亦好鍾意沉香，所以佢自細就接觸沉香，後來自己都加入收藏行列，依家佢收藏嘅沉香係經過百幾年來兩代人累積嘅心血。周樹堂笑笑口話，後來收藏愈來愈多，搞唔掂，於是就開始令沉香平民化，製成手串或同翡翠、美國綠松石等混合設計做首飾系列。當日佢都戴咗一串沉香手串，話好多女士鍾意戴沉香手串取代香水添！
好多政商界名人出席就職禮，包括香港中華文化產業國際聯合會會長梁紹莊同香港鐘表業總會永遠名譽會長孫秉樞等人。創會會長趙振國交棒畀新任會長「拖鞋大王」王偉，王偉話未來任期將盡快落實在大灣區創辦第一個「香港品牌文化館」，為香港品牌創造新商機，再將品牌文化館嘅概念推廣到一帶一路國家同地區，一於輸出香港品牌、香港精神。
黃業光克服時差靠「催眠」
商會副會長黃業光做生意都係衝出國際，佢除咗做鐘錶業，早幾年進軍海外地產市場，包括英、美等地，收成唔錯，但就要做空中飛人。佢笑笑口話個仔喺外國讀書，所以佢真係不停咁飛，但完全冇時差嘅問題，一來佢喺飛機上可以瞓覺，二來佢有一個秘訣就係好似催眠咁話畀自己聽，抵埗後嘅地區係白天就繼續活動，如果係夜晚就瞓覺，千祈唔好記得自己嚟自邊個時區喎。
卓妮