中環出更：又改變主意 姚松炎擬轉戰九西
因宣誓風波被褫奪立法會議員資格嘅姚松炎，一直密謀再參選，繼早前佢計劃出戰港島區補選觸礁後，曾傳出佢會重新挑戰原先嘅建築界功能界別席位，而最新消息指佢將再次改變心意，計劃報名參加民主派就九龍西補選議席嘅初選，意味香爐又添多隻鬼爭食。
姚松炎失去議席後，多次表示樂意接受民主派安排參與補選，一心重奪議席。最先傳出佢會出戰港島，但後來香港眾志表明會派人拎番羅冠聰一席後，令姚松炎嘅算盤打唔響，其後佢退而求其次，暗示會再次挑戰原本屬於佢嘅建築界議席。
參加民主派補選議席初選
佢嘅參選意向搖擺不定，據悉佢依家又改變主意，打算出戰民主派就九龍西補選議席嘅初選，有關決定亦已通知其他初選嘅人士，包括民協立法會前議員馮檢基、民主黨深水埗區議員袁海文，以及公民黨前成員曾健超。
其實九龍西本土自決派亦多次更換人選，獲同樣被取消立法會議員資格、青年新政游蕙禎支持嘅社運人士袁健恩，早前亦決定棄選，然後又傳出另一被褫奪議員資格嘅劉小麗又想出戰，勢估唔到姚松炎又叉隻腳入去，變來變去，都唔知點協調？
卓妮